काठमाडौं, गैर आवासीय नेपाली संघ (एनआरएनए) नेपालको पूर्वाधार विकासका लागि विश्वभरका गैरआवासीय नेपालीले हाल १० अर्ब लगानी गरिसकेको र भविष्यमा त्यो ५० अर्ब पुर्याउने लक्ष्य रहेको बताएको छ । त्यसका लागि गैरआवासीय नेपालीहरुको बाहुल्य रहेको देशमा रोड शो समेत गर्ने र त्यसमा नेपाल सरकारलाई समेत सहभागी गराउने योजना रहेको बताएको छ ।

संघका अध्यक्ष डा. बद्री केसी नेतृत्वको प्रतिनिधि मण्डलले भौतिक पूर्वाधार मन्त्री रघुवीर महासेठसँग भेट गरी लगानी सम्मेलनमा एनआरएनएले सरकारसँग सहकार्य गर्न लागेको जानकारी गराए । डा. केसीले गैरआवासीय नेपालीहरुलाई हालको समयमा लगानीको वातावरण बन्दै गएपनि केही प्रावधानको सहजीकरणका लागि निरन्तर छलफलमा रहेको बताए । केन्द्रमा मात्रै नभई नेपालका सातै प्रदेशका लागि बृहत योजना बनाई काम गर्ने रणनीति रहेको उनको भनाई थियो । सोही अवसरमा आगामी जुन महिनामा संघले प्रथम एनआरएन विश्व महिला सम्मेलन गर्न लागेको पनि उनले अवगत गराए ।

जवाफमा मन्त्री महासेठले लगानीका क्षेत्र पहिचान गरेर मात्रै लगानी गर्न आग्रह गरे । बिना अध्ययन ठूला ठूला परियोजनामा लगानी गर्नुभन्दा साना तर लगानी सुरक्षित हुने क्षेत्र पहिचान गर्न आवश्यक रहेको उनको भनाई थियो ।